【收市閒情】波仔掟貨觀塘名廈 由駱駝漆中心講到「駱駝漆」家族－千頌C

已故舖王波叔鄧成波，喺2014年以10.8億買入駱駝漆中心全幢，呎價12,558元；三年後，即2017年放售，開價28.8億，冇人接；到波叔過身後大約一年，大廈重新放售，叫13至14億，冇人要；上年再劈到11.2億，都冇人要，到依家開價11億，只係高買入價2000萬，變相叫價已時光倒流十年前。

我其實自細觀塘大，所以就睇下駱駝漆中心資料，其實幾有趣。80年代落成嘅駱駝漆中心，歷史上得兩個業主，一個係波叔，一個就係原業主國民製煉漆油，咁睇大廈名就知，公司就係以品牌「駱駝漆」聞名。

其實駱駝漆大廈原先係有4座，到2002年，國民製漆改建為第四座為商廈，先成為今日嘅駱駝漆中心。另外喺活化工廈計劃下，駱駝漆大廈1至3座，早已由原來油漆廠，轉型成為觀塘巨型商場。駱駝漆大廈，可以話見證住香港工業如何由盛而衰。

「駱駝漆」呢個品牌，1932年由7個人喺香港成立，其中一位就係著名企業家黃笏南，年幼時去咗溫哥華，之後輾轉返香港營商。搞過金銀貿易、保險業務，再之後同朋友成立國民製漆，國民製漆成功靠「駱駝漆」響朵。

黃笏南之後仲開咗製衣廠，又發展典當業。1940年代至50年代全盛時期，開咗20幾間當舖。佢嘅後人有唔少知名人士，包括民建聯立法會議員兼全國政協黃英豪，同埋灣仔區區議會前主席黃英琦，都係佢啲孫。

駱駝漆中心早就賣咗俾波叔，至於駱駝漆呢個品牌呢，早於2004就賣咗俾澳洲化工商德家朗，即係DuluxGroup，再於2018年易手至葉氏化工（408）。係呀，駱駝漆係有上市嘅。另一隻同樣喺1932年嘅香港油漆品牌「菊花牌」，其實都有上市，就係中漆集團（1932）。

最後，講返波叔物業，鄧家2022年馬不停蹄賣資產，夾夾埋蝕約10億元，到2023年，到今年4600萬沽佐敦粗菜館舖，10年帳面蝕1800萬；賣佐敦全幢酒店，帳面蝕約2000萬；賣旺角巨舖，持貨5年又蝕3000萬；油麻地砵蘭街巨鋪，持貨6年帳面輸1120萬；唔係冇一單刁賺嘅，旺角皆旺貨車位，賺到三倍，實賺銀碼係750萬……well，填得幾多數？所以如果駱駝漆中心真係可以用11億放到，有得平手算係好架啦。