【沈旭暉專欄】中英夾雜，才是真香港文化

簡單而言，這位觀眾認為從語言學角度，中文採用的「語素文字」 (logographic，或廣義的「方塊字」) 系統，有很多內容不能表達，而不少語言都嘗試混合語素文字與拉丁語系，去填補先天不足。這方面，日文自然是最好的例子，基本上就是一個漢字和拉丁語系在地化的大雜燴。新加坡逐漸從英文+不同中文方言+馬拉文等，演變出自己的所謂「Singlish」，也可以說是類似例子。而且除了實際用途，這種逐漸形成的新語言，也是建構身份認同的重要一環。

分享了以上理論基礎後，另一位熱心讀者大有共鳴，於是示範了「中英夾雜文法」去說明以下問題，相信在非常時期香港生活的大家，也有共鳴：「講嘢嘅時候中英夾雜，可以話係香港人嘅一大特色。有啲更加成為典型香港人嘅經典詞彙。如此獨特嘅語言文化，絕對係香港一個重要嘅Identity。哎吔，就講就用咗。呢啲獨有嘅文化，當然需要記錄落嚟，如果唔將呢啲文化保存，就分分鐘從此消失。」

新一代對某啲嘅詞彙可能比較陌生，同時點都應該聽過吓。經典例如「people mountain people sea」（人山人海）、「dead boy bun」（死仔包）、「go eat rice」（去食飯）、「Long time no see」（好耐無見），「so many people die no see you die」（咁多人死唔見你死）等等⋯⋯ 基礎上係英文，又唔係英文。係直接由廣東話翻譯，完全不理會文法，卻又如此過癮，香港人完全能夠琅琅上口。

我哋講嘢嘅時候亦都好鍾意中英夾雜，例如你會叫個同事「print份report出嚟」、「scan咗份document」、「出嚟食個lunch」、「book場」、「去shopping」、「出trip」等等⋯⋯對於香港人，呢類型嘅表達方式正常不過，一聽就明，對於冇喺香港生活過嘅人，就真係可能「拗晒頭」，而香港人卻會經常不自覺咁樣用咗呢個類型嘅說話模式都不自知，毫不造作，是真性情嘅表達。

除咗中英並重以外，我哋更加鍾意自創詞彙，有冇聽過「un頂able」、「con乜鬼sider」、「time明唔啱」、「in緊」、「grad咗未」等。呢啲基礎上係亂咁嚟，卻又毫違和感。就係過去百多年，香港呢一個華洋雜處，中西薈萃的城市，才能孕育如此文化，那種獨特性，是特色，是身份的認同，也值得自豪。

最後，由細到大都勁中英夾雜，程度係聽到人casual講嘢、但用正式中文翻譯（尤其音譯外文terms，你試吓將LV講做路易威登？），會覺得好cringey老尷。但寫作嚟講，香港人嘅「我手寫我口」就只能自己enjoy，好難發揚光大，可能要中英+口語三語出版？Sir Walter Scott 用Scottish dialect寫作，自成一家，一樣無損佢影響力；曾經嘅周星馳港式笑話都有唔少外國影迷欣賞，究竟香港幾時可以再輸出文化？